19 Чэрвеня
19.06.2019

Анлайн-канферэнцыя «Боль у спіне»: спецыялісты адказваюць на пытанні

logo
Вострае пытанне
78 0 94
Памер шрыфта:
  • A
  • A
  • A

Чым выкліканы востры і працяглы боль у спіне? Якія аперацыі робяць у краіне пры хваробах пазваночніка? Што рабіць з міжпазваночнай грыжай? Якія практыкаванні дзейсныя для прафілактыкі болю ў спіне?

На пытанні чытачоў адказвалі:

  • Іосіф Міхневіч, загадчык неўралагічнага аддзялення №1 5-й гарадской клінічнай бальніцы г.Мінска, урач вышэйшай катэгорыі, кандыдат медыцынскіх навук;
  • Аляксандр Бараноўскі, загадчык нейрахірургічнага аддзялення 5-й ГКБ, галоўны пазаштатны нейрахірург Камітэта па ахове здароўя Мінгарвыканкама, урач вышэйшай катэгорыі, кандыдат медыцынскіх навук.

Міжпазваночная грыжа 6,5 мм + грыжы ва ўсіх (шыйны, грудны і паяснічна-крыжавы) аддзелах пазваночніка, турбуе перыядычны боль. Праца сядзячая + лішняя вага. Як і чым лячыць? Якую гімнастыку раіце рабіць? Як ставіцеся да масажу, падводнага душ-масажу, кіназіятэйпаў і карбаксітэрапіі пры грыжах? Вікторыя

 
Іосіф Міхневіч
Загадчык неўралагічнага аддзялення №1 5-й гарадской клінічнай бальніцы г.Мінска, урач вышэйшай катэгорыі, кандыдат медыцынскіх навук
Для прафілактыкі трэба скінуць вагу. Рэкамендую хаду, спецыяльную гімнастыку лежачы: па чарзе падымаць ногі, рабіць «ровар», вугалкі, маляваць насочкам колца, практыкаванні на баку з адвядзеннем ног убок па чарзе, плаванне. Падводны душ-масаж у басейне таксама добра. Карбаксітэрапія прымальная.

Ці можна вылечыць міжпазваночную грыжу? Сяргей

Іосіф Міхневіч: Вылечыць можна: кансерватыўна – медыкаментамі і фізіятэрапіяй, аператыўна – нейрахірургічнае ўмяшанне.

Пытанне Іосіфу Іванавічу: у мяне пасля даследавання на МРТ пазваночніка (паяснічны аддзел) выяўлена: 1. шырокая фармінальная справа грыжа дыска L2-L3 да 8мм, са звужэннем правага карэньчыкавага канала L2 і ірытацыяй правага карэньчыка L2 у неўральным канале, пазваночны канал на ўзроўні дыска 19мм; 2. дыфузная цыркулярная пратрузія фармінальна злева дыска L3-L4 да 5мм 3. дыфузная цыркулярная пратрузія фармінальна злева дыска L4-L5 да 4мм. Як пазбавіцца ад болю ў спіне: толькі лячэнне або магчымыя спецыяльныя практыкаванні? Іосіф Станіслававіч

Іосіф Міхневіч: Трэба прайсці комплекснае лячэнне ў неўралагічным аддзяленні стацыянара, з ужываннем блакадаў для зняцця абвастрэнняў, а затым рабіць дома спецпрактыкаванні для ўмацавання мышачнага гарсэта і прафілактыкі абвастрэнняў. Акрамя гэтага, трэба правільна падымаць цяжар, правільна сядзець за сталом. Мэбля павінна падтрымліваць фізіялагічны выгіб паяснічнага аддзела (лардоз). Таму аўтавытворцы паказваюць, што ў машыне ёсць рэгуляванне паяснічнага ўпора для падтрымання лардоза – каб паменшыць нагрузку. Абавязкова трэба гэта ўлічваць.

Пасля родаў з цягам часу з'явіўся дыскамфорт у вобласці пазваночніка ў паяснічным аддзеле, асабліва пры нахіле наперад. А ў апошні час пры нагрузцы пачалі балець нават калені. Мы гэта звязваем з пастаяннай нагрузкай пры нашэнні малога. А насамрэч чым выкліканы гэты дыскамфорт? Ці варта звяртацца да ўрача і якога? Ці можа боль прайсці, калі нагрузка знізіцца? Ці ёсць спосабы зняцця гэтай напругі ў паясніцы? Марына, 28 гадоў

Іосіф Міхневіч: Дыскамфорт выкліканы тым, што за час цяжарнасці сталі слабейшай, а нагрузкі павялічыліся. Трэба абмяжоўваць нагрузку, выкарыстоўваць гарсэт на паяснічны аддзел і рабіць мерапрыемствы на ўмацаванне паяснічнага аддзела: зарадка, плаванне. Можна рабіць масаж паясніцы і спіны. Калі не атрымаецца справіцца названымі спосабамі, трэба звярнуцца да ўрача.

Ёсць падазрэнне на спандыладысцыт. Ці маюцца эфектыўныя метады пацвердзіць/абвергнуць гэтае захворванне, не звяртаючыся да тэрапіі антыбіётыкамі? Ці магчымае памяншэнне грыжы міжпазванковага дыска (МПД) пры кансерватыўным лячэнні?

 
Аляксандр Бараноўскі
Загадчык нейрахірургічнага аддзялення 5-й ГКБ, галоўны пазаштатны нейрахірург Камітэта па ахове здароўя Мінгарвыканкама, урач вышэйшай катэгорыі, кандыдат медыцынскіх навук
Для таго, каб устанавіць гэты дыягназ, трэба зрабіць МРТ. І ўдакладніць, гэта спецыфічны або неспецыфічны спандыладысцыт. І па выніках ужо прызначаецца медыкаментознае лячэнне. Памяншэнне грыжаў пры кансерватыўным лячэнні магчымае: на працягу года грыжа можа зменшыцца напалову.

Які працэнт пацыентаў, прааперыраваных на грыжу МПД у стандартным выпадку з прымяненнем мікрадыскэктоміі, атрымліваюць рэцыдывы/ускладненні і вымушаныя звярнуцца да паўторнай аперацыі?

Аляксандр Бараноўскі: У клініках Мінска рэцыдывы грыжаў міжпазванковых дыскаў пасля іх аператыўнага лячэння – 5-12%. Але пасля аперацыі неабходна выконваць рухальны рэжым.

У якіх выпадках прымяняльнае эндаскапічнае выдаленне грыжы? Якія плюсы і мінусы дадзенай аперацыі? У Беларусі іх робяць?

Аляксандр Бараноўскі: Эндаскапічнае выдаленне грыжы магчымае, калі грыжа (секвестр) размяшчаецца ў межах пазваночнага канала. Калі секвестр сыходзіць (карэньчыкавая кішэня, вышэй- і ніжэйлеглая дужка ды іншыя зрушэнні), у гэтых выпадках эндаскапічнае выдаленне не прымяняецца. Гэта малаінвазіўны метад, аднак рэцыдывы пры ім больш частыя. У Беларусі такія аперацыі эпізадычна выконваюцца ў РНПЦ траўматалогіі і артапедыі.

Ці эфектыўная карэньчыкавая блакада глюкакартыкоідамі пры мышачным спазме?

Іосіф Міхневіч: Усе блакады эфектыўныя, калі прымяняюцца па паказаннях.

Ці робяць у Беларусі эпідуральную блакаду ў пазваночнік пад кантролем рэнтген/УГД апаратуры?

Іосіф Міхневіч: Робяць, але не часта.

Цягне левую нагу, урачы нічым да гэтага часу не дапамаглі. Працую вадзіцелем, але і цяжар падымаю. Шмат разоў зрываў спіну, абыходзіўся ўколамі дыклаберл фортэ. Як пазбавіцца ад цягі ў назе?

Іосіф Міхневіч: Спачатку трэба ўстанавіць дакладны дыягназ. Цягнучы боль у назе можа быць па розных прычынах: паражэнне венаў, артэрый, пазваночніка, тазасцёгнавага сустава, нават мышцаў.

Майму тату 62 гады. Усё жыццё працаваў вадзіцелем вялікагрузных аўтамабіляў. Мае міжпазванковыя грыжы, падагру і астэахандроз, пакутуе ад залішняй вагі і гіпертаніі. Яго праблемы са спіной лячылі абязбольвальнымі (пастаянна прымае Аэртал), супрацьзапаленчымі прэпаратамі, па класічнай схеме. Большасць з іх згубна ўплываюць на сэрца. На працягу года ў яго мігацельная арытмія, пастаянны збой рытму. Апошнім часам скардзіцца, што вельмі складана перасоўваць ногі, у ступнях здранцвенне. Пройдзе некалькі метраў – і трэба тэрмінова прысесці з-за рэзкага болю ў спіне. Мы робім лёгкія практыкаванні без нагрузкі, лежачы на падлозе, для расцяжэння пазваночніка – боль робіцца меншым. Ці можа бацька атрымаць лячэнне без прымянення вялікай колькасці прэпаратаў (каб не пагоршыць праблему з сэрцам), а пры дапамозе фізіятэрапіі, правісання, ЛФК? Калі гэта магчыма, куды нам трэба звярнуцца? Вольга

Іосіф Міхневіч: З інфармацыі незразумела, якое захворванне пазваночніка маецца. Гэта можа быць звязана са стэнозам (звужэннем пазваночнага канала), з пандылалістэзам (зрушэннем пазванка). Трэба зрабіць МРТ, свежае абследаванне. Перш за ўсё трэба звярнуцца да неўролага.

Дыягнаставалі перадгрыжавы стан. Ці магчыма вылечыць без хірургічнага ўмяшання? Ці існуе сістэма практыкаванняў для лячэння міжпазванковай грыжы? Ці супрацьпаказаныя бег, ровар? Ці дапамагае скандынаўская хада? Аляксандр

Іосіф Міхневіч: Мы ўжо адказалі пра неабходныя практыкаванні вышэй. Хада, у тым ліку скандынаўская, – лепей за бег, плаванне – лепей за ровар.

З'яўляюся «шчаслівым» уладальнікам міжпазванковага астэахандрозу паяснічна-крыжавога аддзела пазваночніка з дарсальнымі грыжавымі выпінаннямі МПД на узроўнях L3-L4, L4-L5, L5-S1. Спіна баліць заўсёды. Падчас абвастрэння абцяжаранае нават простае прамахаджэнне, аддае ў нагу да кульгавасці. Якія метады лячэння гэтай праблемы прапануе сучасная медыцына Беларусі? У якую ўстанову параіце звярнуцца? Якіх нагрузак з дадзеным дыягназам варта пазбягаць (праца пераважна сядзячая, але ў вольны час хаджу пешшу 10-15 км або езджу на ровары 15-20 км)? Міхаіл, 42 гады

Іосіф Міхневіч: Трэба пазбягаць працы з нахілам, узняццем цяжару, працы ў нязручнай позе. Працягвайце хадзіць, дадайце плаванне і падводны душ-масаж.

У 2017 годзе на МРТ выявілі сенквістральную грыжу ў паяснічным аддзеле пазваночніка. Прапаноўвалі аперацыю – не пагадзілася, жыву так ужо два гады. Боль турбуе перыядычна. Якія абследаванні трэба зрабіць, каб даведацца прычыну болю, і ці можна вылечыцца без аперацыі?

Аляксандр Бараноўскі: Вам неабходна зрабіць паўторнае МРТ паяснічнага аддзела і затым звярнуцца да нейрахірурга па кансультацыю.

У мяне вельмі моцны боль у правым плячы, пачынаючы ад лапаткі. Пачаўся прыкладна 5 гадоў таму, зараз мне 32. Адразу боль быў вельмі вострым, асабліва ў шыі, паднялася тэмпература. Я легла ў бальніцу з іншым захворваннем, і там спадарожна мне сказалі, што ў мяне хутчэй за ўсё артрыт. Але афіцыйна дыягназ так і не паставілі. Цяпер я разы тры на год пакутую ад болю, плячо і ўся рука проста адымаюцца. Паколькі дакладнага дыягназу не ведаю, зыходжу з таго, што гэта артрыт, дык два разы на год раблю масаж і фізіяпрацэдуры. Пасля гэтага баліць амаль не перастаючы, не дакрануцца, асабліва над лапаткай, проста немагчыма з-за болю. Да якога ўрача трэба звярнуцца, каб паставіць дакладны дыягназ? Што можна зрабіць, каб зняць абвастрэнне? Вольга

Іосіф Міхневіч: Вам неабходная кансультацыя неўролага і рэўматолага. Пасля ўстаноўкі дыягназу будзе падабранае лячэнне для зняцця болю.

Увосень 2018 года гуляў у футбол. Ударыў галавой па мячы – адчуў шчаўчок у шыі і боль. Паварочванне галавы ў любы бок суправаджалася вострым болем. Да ўрача не звяртаўся, падумаў, што проста зашчаміў нерв. Боль прайшоў, але з таго часу пры павароце галавы ў крайняе правае становішча адчуваю дыскамфорт у раёне правай лапаткі (пры павароце галавы ў левы бок такога няма). Ці варта звярнуцца да ўрача або можна пазбавіцца ад болю з дапамогай якіх-небудзь практыкаванняў? Аляксандр, 30 гадоў.

Аляксандр Бараноўскі: Абавязкова рэкамендую МРТ шыйнага аддзела пазваночніка з наступнай кансультацыяй неўролага і нейрахірурга.

Баліць спіна ў вобласці паясніцы, а таксама шыйны аддзел, які вядзе да галаўнога болю. Якія абследаванні рабіць і да якога ўрача потым звяртацца? Анастасія

Аляксандр Бараноўскі: Зноў-такі, абавязкова рэкамендую МРТ шыйнага і паяснічнага аддзелаў пазваночніка з наступнай кансультацыяй неўролага і нейрахірурга.

Ці можа пазваночная грыжа быць прычынай памяншэння мышачнага аб'ёму правай нагі? З грыжай з пераменным поспехам змагаюся 15 гадоў. Юрый, 56 гадоў (Крупкі)

Іосіф Міхневіч: Грыжа дыска можа выклікаць кампрэсію нервовага карэньчыка, у выніку чаго можа развівацца гіпатрафія мышцаў.

Падкажыце, чым можа быць выкліканы боль у паяснічным аддзеле пазваночніка пры чханні і кашлі? Ці можна займацца танцамі пры такіх болевых адчуваннях? Іванна

Іосіф Міхневіч: Боль пры чханні і кашлі кажа пра тое, што ёсць звужэнне пазваночнага канала. А гэта можа быць выклікана грыжай дыска, неўрыномай, спандыяартрозам. Неабходнае абследаванне. Да высвятлення прычыны з танцамі варта пачакаць.

Зрабіў МРТ: грыжа л5с1 6мм. Урач сказаў, што ў мяне вялікі пазваночны канал і карэньчыкі моцна не заціскае, выпісаў 5 уколаў эуфіліну і токі. Спіна так і баліць, аддае ў правую нагу. Што рабіць?

Аляксандр Бараноўскі і Іосіф Міхневіч: Гэтага проста аказалася недастаткова. Трэба правесці больш актыўнае комплекснае кансерватыўнае лячэнне, магчыма ў стацыянары.

Мне 27 гадоў, адчуваю частыя міжвольныя «прастрэлы» ў паясніцы. Гэткае ж адчуванне пастаянна нагружанага паяснічнага аддзела. ЗАКЛЮЧЭННЕ: МРТ прыкметы пачатковых дэгенерацыйна-дыстрафічных змяненняў паяснічнага аддзела пазваночніка (астэахандроз, грыжы Шморля), МРТ прыкметы спандылаліза L5. Якім чынам мне змагацца з прастрэламі і забітасцю ў паяснічным аддзеле? Яўген

Іосіф Міхневіч: Рэкамендуем вам зрабіць функцыянальныя здымкі (у стане згінання і выпроствання паяснічнага аддзела) для выключэння нестабільнасці пазванкоў.

Паўгода таму была праведзеная аперацыя – рэзекцыя правага яечніка. Праз месяц пасля аперацыі пачаў балець правы бок ніжэй паясніцы ў становішчы лежачы. Боль моцны. УГД яечніка, нырак і мачавога пузыра – ніякіх адхіленняў не выяўлена. Але боль працягвае ўзмацняцца. Аналізы ў норме. Тэрапеўт выпісала Тызалуд – не дапамагло! У неўрапатолага пакуль не была. Ці трэба да яго ісці і што гэта можа быць? Наталля.

Іосіф Міхневіч: Трэба зрабіць МРТ таза для выключэння паталогій ў крыжава-падуздошным складанні і правым тазасцёгнавым суставе.

Грыжа L5S1 7.5мм. Год таму заціснула нерв, што выклікала здранцвенне пальцаў на назе. Затым не змог уставаць на дыбачкі, паколванне ў пальцах. Пасля курсу лячэння зрабілася лягчэй. На дыбачкі падымаюся, здранцвенне прайшло. Але боль турбу. Прайшоў курс лячэння ў санаторыі: азонатэрпія, радонавыя ванны, электрафарэз з карыпазімам. Ці варта паўтараць гэтыя працэдуры і што рабіць далей, як змагацца?

Аляксандр Бараноўскі і Іосіф Міхневіч: Трэба паўтарыць лячэнне для зняцця абвастрэння цалкам і затым займацца мерапрыемствамі па прафілактыцы. Паўтарыць названыя вамі працэдуры варта.

У мяне выяўленая заднемедыянная грыжа С6-С7 памерам 4мм, памер ПК на яе ўзроўні да 9-10 мм.Таксама маюцца заднемедыянныя пратрузіі С3-С6 да 1-2мм ў наваколлі астэафітаў. Моцны боль у правай руцэ, пад лапаткай, боль у шыі, галаўны боль, паколванне ў правай руцэ і здранцвенне ў руцэ ад запясця да локця і ў назе ад ступні да калена, перыядычна нямее правы бок твару. Сон 2-3 гадзіны за ноч. Няўжо толькі аперацыя? Рэфлексатэрапеўт параіла рабіць комплекс Кракадзіл для пазваночніка з ёгі, але там скручванні. Ці можна? І якія можна рабіць практыкаванні пры маім відзе грыжы, каб яна не павялічылася?

Іосіф Міхневіч: Аперацыя неабавязковая. Варта выключыць фарсіраваныя практыкаванні на скручванні. Паказаная ізаметрычная гімнастыка.

Праблемы са спіной ужо каля 5 гадоў: моцны боль у шыі і ва ўсіх мышцах спіны. Здараюцца зашчымленні нерва ў спіне, здранцвенне рук і часам ног. Часам блакуецца дыханне ў грудным аддзеле. Ёсць змешванні ў шыйным і грудным аддзелах, грыжы быццам бы яшчэ няма. Паспрабавала масажы, лячэнне ў астэапатаў і фізіятэрапеўтаў, плазмаліфтынг у мышцы спіны. Магнітна-хвалевая тэрапія, блакады – выніку няма. Боль вельмі моцны, даводзіцца піць абязбольвальныя. Што рабіць? Юля, 29 гадоў

Іосіф Міхневіч: Верагодна, у вас ёсць неўратычныя расстройствы. Неабходная кансультацыя псіхатэрапеўта.

Прачнуўшыся раніцай, адчуў боль у шыйным аддзеле ў раёне пазваночніка. Спаў з закінутай галавой. Галаву не мог павярнуць тыдзень, потым усё прайшло. Што гэта за дэфект арганізма і як зрабіць дыягностыку? Яўген, 30 гадоў

Аляксандр Бараноўскі: Прычына вашага стану можа быць абумоўлена доўгім знаходжаннем шыйнага аддзела ў няправільнай позе. Калі боль працягвае турбаваць, неабходна прайсці МРТ шыйнага аддзела.

Прыкладна ў 35 гадоў на спаборніцтвах па валейболе адчуў боль у падрабрынні. Праз два гады анямелі ногі па пояс. Быў на прыёме ў «кастаправа», выконваў атрыманыя рэкамендацыі. Потым зноў усё выявілася, але значна слабей. Перыядычна дранцвеюць пальцы на нагах і пастаянна адчуваецца здранцвенне вонкавай паверхні сцягна правай нагі. У 45 былі праблемы з правай нагой, пралячыўся у хірурга. За два месяцы адпусціла. Ці варта нешта яшчэ рабіць? Уладзімір, 49 гадоў

Аляксандр Бараноўскі і Іосіф Міхневіч: Ёсць прыкметы паражэння спіннога мозгу. Таму неабходна правесці абследаванне: МРТ груднога аддзела. І далей пракансультавацца ў неўролага.

Мой дыягназ: міяфасцыяльны болевы сіндром з трыгернымі зонамі ў мышцах верхняга плечавога пояса. Пастаянны, няспынны боль на працягу апошніх трох месяцаў. Якія будуць рэкамендацыі і парады? Дзмітрый Міхайлавіч

Іосіф Міхневіч: Трэба правесці адэкватнае лячэнне: медыкаменты, блакады, фізіятэрапія, масаж.

Працяг анлайн-канферэнцыі чытайце на нашым партале ў бліжэйшы час. Сачыце за абнаўленнямі!

Фота – Яўген Крэч.

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

78 0 94

Журналіст
Глядзіце таксама
Наверх