19 Лютага
19.02.2020

Чым небяспечныя скачкі на батуце. Распавядае траўматолаг

logo
Здароўе дзяцей
157 0 29
Памер шрыфта:
  • A
  • A
  • A

Усе дзеці любяць скакаць на батуце, а мамы і таты са спакойнай душой адпускаюць іх у батутныя цэнтры ці купляюць гэтае спартыўнае абсталяванне на дачу. Разам з тым, траўматолагі занепакоеныя ростам траўмаў у дзяцей, у прыватнасці, кампрэсійнага пералому пазваночніка, атрыманага падчас скачкоў на батуце. З-за працяглай і нязвыклай нагрузкі павялічваецца вертыкальны ціск (кампрэсія) на цела пазванкоў, а таксама на каленныя і галёнкаступнёвыя суставы.

Кампрэсійны пералом пазваночніка. Небяспека батутаў.

У гутарцы з журналістам інфармацыйнага партала Здаровыя людзі траўматолаг-артапед прыёмнага аддзялення РНПЦ траўматалогіі і артапедыі Андрэй Ярашэвіч распавёў, што кожны тыдзень у цэнтр звяртаюцца ад 3 да 5 чалавек з кампрэсійным пераломам пазваночніка – з-за скачкоў на батуце.

Пра тое, што такое кампрэсійны пералом пазваночніка, чым ён небяспечны і чаму траўма адбываецца падчас працяглых скачкоў на батуце, чытайце ў нашым матэрыяле.

Кампрэсійны пералом пазваночніка. Дыягностыка

Кампрэсійны пералом пазваночніка – гэта не пералом у звыклым нам разуменні. Пры гэтай траўме з-за кампрэсіі (сціскання) адбываецца сплюшчванне цела аднаго або некалькіх пазванкоў. Касцяная тканка дэфармуецца. У дарослага чалавека часцей за ўсё пакутуе паяснічны аддзел пазваночніка, у дзяцей – грудны. З-за дэфармацыі, якая прыходзіць у выніку ўздзеяння сіл, накіраваных зверху ўніз, цела пазванка робіцца клінападобнай формы, тады як у норме яно нагадвае цыліндр.

Кампрэсійны пералом пазваночніка. Выгляд на здымку.

Небяспека гэтай траўмы ў тым, што ў дзяцей кампрэсійны пералом пазваночніка дрэнна дыягнастуецца.

 
Андрэй Ярашэвіч
Траўматолаг-артапед прыёмнага аддзялення РНПЦ траўматалогіі і артапедыі
У дзяцей касцёвая сістэма дастаткова пластычная і не такая ўстойлівая да нагрузак, не такая паўнавартасна моцная, як у дарослага чалавека. У пэўныя перыяды росту адбываецца змена цела пазванка, насычэнне яго кальцыем і ўмацаванне структураў. У дзіцяці пазванкі яшчэ, скажам так, як губка. З-за гэтага пры кампрэсійным пераломе цела пазванка можа дэфармавацца і ўжо не расправіцца.

Кампрэсійны пералом пазваночніка. Ляжаць на спіне трэба большую частку часу.

Клінападобная дэфармацыя можа быць настолькі невялікая, што на звычайных рэнтгенаўскіх здымках яна не бачная. Таму для больш дакладнай дыягностыкі выкарыстоўваецца МРТ-даследаванне, падчас якога можна таксама вызначыць, ці даўно была атрыманая траўма, ці гэта яшчэ «свежы» пералом.

 
Андрэй Ярашэвіч
Траўматолаг-артапед прыёмнага аддзялення РНПЦ траўматалогіі і артапедыі
У дзяцей з-за асаблівасці арганізма на рэнтгенаўскіх здымках усе пазванкі будуць аднолькавыя. І толькі на МРТ можна ўбачыць розніцу за кошт таго, што адбываецца ўнутрыкасцявы ацёк – унутрыкасцявое кровазліццё, да якога прыводзіць сцісканне.

Як адбываецца кампрэсійны пералом

Падчас скачкоў на батуце дзіця, як правіла, расслабленае, знаходзіцца ў стане лёгкага ўзбуджэння і не кантралюе сваю паставу, галава і рукі расслабленыя. Паяснічная вобласць больш напружаная. Пазваночнік за кошт напругі мышцаў бы стабілізуецца ў паясніцы, а расслабленая верхняя частка цела прымушае пазваночнік адхіляцца наперад, што прыводзіць да большай нагрузкі ў грудным аддзеле. У выніку адбываецца доўгае пераменнае сцісканне целаў грудных пазванкоў.

Кампрэсійны пералом пазваночніка. Батуты.

 
Андрэй Ярашэвіч
Траўматолаг-артапед прыёмнага аддзялення РНПЦ траўматалогіі і артапедыі
Падчас працяглых скачкоў цяжкая верхняя палова расслабленага цела – галава і рукі пастаянна ціснуць на грудны аддзел пазваночніка. Прычым, як правіла, уздзеянню падвяргаюцца ад 5-га да 8-га груднога пазванка. Дарэчы, у нас нядаўна было дзіця, у якога ўжо бачная клінападобная дэфармацыя. Зрабілі МРТ – пашкоджаныя з другога па восьмы пазванок! У анамнэзе – скачкі на батуце.

Астэахандроз і скрыўленне пазваночніка. Наступствы траўмы

Калі своечасова не дыягнаставаць і не вылечыць кампрэсійны пералом пазваночніка, у дзяцей можа адбыцца фарміраванне юнацкага астэахандрозу. Траўма ў наступным прыводзіць да скрыўлення пазваночніка. Кампрэсійны пералом не прыводзіць да інвалідызацыі, але значна абмяжоўвае магчымасці дзіцяці ў будучым.

осмотр позвоночника у детей

 
Андрэй Ярашэвіч
Траўматолаг-артапед прыёмнага аддзялення РНПЦ траўматалогіі і артапедыі
Пры сур'ёзнай кампрэсіі ўзнікае сцісканне карэньчыкавых структураў і спіннога мозгу. У выніку гэтага на пазванках фарміруюцца ўтварэнні, што нагадваюць шыпы (астэахандроз), якія, у сваю чаргу, з усіх бакоў ціснуць на спінны мозг.

Клінападобная дэфармацыя пазванка прыводзіць да няправільнага фарміравання паставы. Прычым змены могуць адбываецца не толькі ў пярэдне-заднім, але і ў бакавых накірунках.

Нялечаны кампрэсійны пералом пазваночніка можа прывесці ў далейшым да працяглага болевага сіндрому, а дэфармацыі могуць захоўвацца ўсё жыццё. Як вынік – паказанне для аператыўнага ўмяшання ў наступным.

Тры дні без болю. Першыя сімптомы і лячэнне

Кампрэсійны пералом пазваночніка. Праблемы ў будучым.

Як правіла, кампрэсійны пералом пазваночніка першыя тры дні можа ніяк сябе не праяўляць. Болю ў спіне не будзе. Дэфармацыя яшчэ невялікая, але разам з тым, калі дзіця працягвае нагружаць яго, хадзіць, у пазваночніку працягваюць адбывацца змены.

 
Андрэй Ярашэвіч
Траўматолаг-артапед прыёмнага аддзялення РНПЦ траўматалогіі і артапедыі
Што павінна насцярожыць бацькоў? Боль у спіне, якая з'явілася на другія-трэція суткі, асабліва калі да гэтага дзіця доўга скакала на батуце. Прычым боль не праходзіць, а паступова нарастае. Магчымы таксама боль і цяжар за грудзінай пры ўдыху. У такіх выпадках наведванне ўрача павінна быць неадкладным.

Лячэнне кампрэсійнага пералому пазваночніка ў дзяцей з-за асаблівасцяў арганізма – кансерватыўнае. Як правіла, прызначаецца пасцельны рэжым на працягу 1-1,5 месяца. Хадзіць дазваляецца толькі пры вялікай неабходнасці. Больш за палову часу – становішча лежачы на спіне. Магчыма выкананне спецыяльных практыкаванняў на карачках з прагнутаю спіной. У наступным неабходна нашэнне карэктара паставы для груднога аддзела пазваночніка. Забарона на заняткі фізкультурай на працягу 2-3 месяцаў, заняткі ЛФК на ўмацаванне мышцаў спіны. Добра дапамагае плаванне.

Кампрэсійны пералом пазваночніка. Плаванне.

 
Андрэй Ярашэвіч
Траўматолаг-артапед прыёмнага аддзялення РНПЦ траўматалогіі і артапедыі
У дарослых пры такой траўме, як правіла, паказанае аператыўнае ўмяшанне. Вырабляецца фіксацыя з дапамогай канструкцыі, якая ўводзіцца ў пазваночнік, і целы пазванкоў рассоўваюцца механічным чынам. У дзіцяці падобную аперацыю выканаць немагчыма, бо пазваночнік яшчэ расце і фарміруецца, а падобныя канструкцыі будуць замінаць гэтым працэсам.

Не забараняць, але кантраляваць

Як і любы новы від фізічнай нагрузкі, скачкі на батуце патрабуюць захавання пэўных правілаў. Нагружаць  пазваночнік і суставы дзіцяці, якія яшчэ фарміруюцца, працяглымі скачкамі не варта. Калі дзіця не падрыхтаванае да актыўных фізічных практыкаванняў, яго пазваночнік не ўмацаваны мышачным гарсэтам, адсутнічае папярэдняя натрэніраванасць, дык у дзяцей, якія не прывыклі да доўгай фізічнай нагрузкі, пакутуюць «слабыя месцы» пазваночніка, шыі, суставаў.

Кампрэсійны пералом пазваночніка. Небяспека батутаў.

 
Андрэй Ярашэвіч
Траўматолаг-артапед прыёмнага аддзялення РНПЦ траўматалогіі і артапедыі
Мы ні ў якім разе не выступаем за забароны скачкоў на батуце. Аднак вельмі важна кантраляваць дзяцей падчас гэтай забавы. Трэба выконваць дакладны рэгламент і не дазваляць скакаць без перапынку на працягу доўгага часу. Калі ёсць магчымасць, вазьміце пару ўрокаў у дасведчанага інструктара, які навучыць дзіця правільна групавацца падчас скачкоў, напружваць мышцы верхняга аддзела плечавога пояса, каб пазваночнік быў стабілізаваны. Батуты – гэта спартыўнае абсталяванне і, як любое іншае, патрабуе захавання пэўных правілаў бяспекі. Правільнае і граматнае стаўленне да такой забаўкі значна знізіць рызыку непажаданай траўмы.

Спецыяліст дадаў таксама, што пры першых скаргах дзіцяці на боль у спіне пасля скачкоў на батуце абавязкова трэба звярнуцца да ўрача. Расказаць доктару, што дзіця скакала на батуце. Гэта дапаможа правільна дыягнаставаць траўму і своечасова пачаць лячэнне, якое пры ўмове выканання ўсіх рэкамендацый урача дазволіць пазбегнуць праблемаў у будучым.

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

157 0 29

Наверх