4 Снежня

І ў дождж, і ў снег, і ў спёку, і ў слату…

Думкі ўслых
135 0 26
Памер шрыфта:
  • A
  • A
  • A

... як вы думаеце, што варта рабіць? Правільна, гуляць! Толькі, вядома ж, не тады, калі аб’яўлены аранжавы ўзровень. І не ў цыклон «Хаўер» – мы яшчэ доўга на яго не забудземся… Але калі надвор’е і не дужа камфортнае, многія мяркуюць: лепей рухацца, чым сядзець у памяшканні. А як звычайна робіце вы?

Прагулкі пад дажджом.

На мяне, бывае, накатвае. І тады я працую над пераадоленнем сябе. Памятаю, калі мела, так бы мовіць, падаленую працу, спрабавала штодня, нягледзячы на надвор’е, а шостай (улетку ж – увогуле а пятай) раніцы выходзіць на прагулку і праходзіць хуткім крокам каля трох з паловай кіламетраў.

Дождж, вецер – нічога не палохала. І якія высновы я з гэтага зрабіла?! Што пераважная большасць таго, што пішуць пра карысць пешых прагулак, – праўда. Ёсць такія папулярныя публікацыі на розныя тэмы, дзе супрацьпастаўляюцца міфы і раэльнасць. Я ж хачу напісаць пра вядомыя меркаванні спецыялістаў і ўласныя адчуванні.

Дык якімі ж «магічнымі ўласцівасцямі» валодаюць звычайныя прагулкі?

Прагулкі. Людзі сталыя ў парку.

  1. Паляпшаюць настрой і пазбаўляюць ад стрэсаў.

І гэта так! Калі ідзеш даволі хутка і засяроджваешся на рытмічным дыханні, падлічваеш крокі, сама сабе нячутна спяваеш альбо дэкламуеш верш (напрыклад, баладу «Свіцязянка» Адама Міцкевіча)… Іншых думак у галаве не застаецца. А стрэс, як пабіты сабака, падціскае хвост і самаліквідоўваецца! 🙂 І нават па прыходзе дахаты ты не прыгадваеш, што цябе штосьці дужа турбавала альбо нервавала. Мінус негатыў. Чым дрэнна?!

  1. Станоўча ўздзейнічаюць на працу мозгу, канцэнтрацыю і памяць.

Ну, што трэніраваць мозг і памяць можна, прыгадваючы вершы і песні, дык гэта ж стопудова!А што датычыць канцэнтрацыі… Таксама прысутнічае. Бо ідзеш і паспяваеш яшчэ пазіраць па баках. І, бывае, штосьці нават на даўно знаёмым маршруце згледзіш такое цікавае! І здзівішся: а як жа раней не заўважала?! Прычым не спецыяльна ці мэтанакіравана. А цалкам нязмушана. Сапраўды, само сабой атрымліваецца! Пацвярджаю.

Прагулкі. Пабачыць дзіва.

  1. Адчувальна ўплываюць на здароўе.

О, як мне падаецца, дастаткова толькі ўзгадак пра гэта – і ўсе павінны накіравацца на прагулку! Адразу ж! 🙂 А калі сур’ёзна…Што такое прагулкі? Гэта найперш фізічная актыўнасць. А яна, як вядома, паляпшае працу сэрца, зніжае артэрыяльны ціск. Пры гэтым паскараецца абмен рэчываў і ўмацоўваецца імунітэт. І калі дзве апошнія пазіцыі не заўсёды атрымліваецца так выразна адчуць, дык па першых магу сказаць: праўда. Бо лічбы на танометры не маняць…

Толькі зараз не пра сябе, а пра блізкіх. Бо мяне танометры… не любяць. У нас з імі гэта ўзаемна. Колькі спробаў было… Альбо ідзе апарат на другую закачку і паказвае абы-што, альбо пасля закачкі – «ЕЕЕ», толькі ў адваротны бок напісаныя… Таму ў гэтай справе даводзіцца давяраць выключна ўласным адчуванням.

  1. Напаўняюць энергіяй.

Прагулкі. Энергія

Ого, ды яшчэ як! Асабліва, калі прагуляешся пад дажджом. Ці пад снегам. А калі яшчэ падчас прагулкі ўцякаеш ад сабачак… Во дзе энергіі! 🙂 А самае цікавае, што бадзёрай прагулкай можна замяніць… кубак кавы! Асабліва, калі ён ужо лішні. Праверыла. Кавы сапраўды не хочацца пасля прагулкі. Ну, толькі калі ўдыхнуць водар… 🙂 Не больш за тое.

Памятаю, як у 2010-ым я адпачывала ў літоўскай Паланзе. Тры тыдні. Зразумела, апрача пакуначкаў з чаем набрала з сабой і кавы «тры ў адным». Каб не замарочвацца з цукрам, яшчэ і яго не цягнуць.

… Так і прыехала ўся мая кава некранутай дахаты. Бо! Гуляла я там з ранку да вечара, дыхала марскім паветрам. Здаецца, столькі вольнага часу! Пі каву – не хачу! І ніхто ж не скажа, што гэты кубак ужо лішні. Не захацелася. Ні разу. Во дзе сапраўднае дзіва!

Прагулка. Адмова ад кавы.

  1. Паляпшаюць сон.

Здаецца, таксама доказу ды даследаванняў дадатковых гэтае сцвярджэнне не патрабуе. Эх, даўнавата я не гуляла перад сном! Трэба ўзнавіць прагулкі. Асабліва люблю ўзімку… Калі пад нагамі рыпіць снег і пераліваецца ў святле бліжэйшых ліхтароў. Калі марознае паветра напаўняе адчуваннямі спакою і шчасця. Калі думаецца толькі пра добрае. Эх! Ну дзе ж наш вялікі і пульхны сухі снег?!

Вядома ж, пунктаў яшчэ хапае. Але давайце спынімся хаця б на гэтых. Задумаемся. Захочам. І яя-я-я-як пойдзем! 🙂 Гуляць!!! Ранкам – да працы, па абедзе – па наваколлі. А ўвечары – проста з дому! Спецыяльна! У пошуках моцнага і здаровага сну! З вяртаннем дахаты, вядома ж…

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

135 0 26

Рэдактар беларускай версіі сайта, журналіст, блогер

Каб перайсці да абмеркавання, выканайце уваход або зарэгіструйцеся

Наверх