21 Снежня

Як выбраць правільны глазураваны сырок

Выбірай прадукты
79 0 55
Памер шрыфта:
  • A
  • A
  • A

Мяккая тварожная маса з даданнем сметанковага масла і цукру, пакрытая шакаладнай глазурай – так выглядаў тварожны сырок, выраблены па ДАСТу ў СССР. З тых часоў асартымент глазураваных сыркоў значна пашырыўся, але з чаго рыхтуюць іх сёння?

Глазураваныя тварожныя сыркі, як і раней, у сваім складзе ўтрымліваюць тварог, а вось глазураваныя сыркі могуць вырабляцца з тварожнага прадукту. Гэта не зусім звыклы тварог. Вырабляюць яго з адноўленага сухога малака з даданнем заменнікаў малочнага тлушчу – пальмавага або какосавага алею. Гэтыя раслінныя тлушчы ўтрымліваюць да 50% насычаных тлустых кіслот, якія могуць спрыяць развіццю атэрасклерозу.

Выкарыстанне маргарынаў і раслінных алеяў значна зніжае кошт прадукту. Каб «замаскіраваць» прысутнасць расліннага алею, вытворца можа напісаць «сырок глазураваны з заменнікам малочнага тлушчу». Часта такая назва сустракаецца на расійскіх сырках.

Для надання арыгінальнага смаку дадаткова ўносяцца смакаводарныя рэчывы (напрыклад, ваніль), для захавання формы – эмульгатары (лецыцін), ну, а кансерванты (сарбат кальцыя, бензаат натрыю) дазваляюць даўжэй захаваць прадукт.

Масавая доля тлушчу ў сырках, вырабленых з тварожнага прадукту, вышэйшая, чым у такіх жа прадуктах з тварагу, а вось бялку, наадварот, менш!

Глазураваны сырок – гэта кандытарскі выраб, дэсерт. Каларыйнасць у 100 г прадукту больш за 400 ккал, утрыманне тлушчу ад 18 да 25%, вугляводаў у сярэднім 36 г, з іх цукрозы 34,3 г (33%), таму тым, хто хоча пахудзець, лепш абыходзіць іх бокам.

Глазураваны сырок з масавай доляй тлушчу 18% і 23% – у якім калорый больш?

Каларыйнасць вызначае не толькі колькасць тлушчу, але і вугляводаў. Пры меншым утрыманні тлушчу каларыйнасць можа быць дастаткова высокай за кошт вялікага ўтрымання цукру.

Шакаладная абалонка – гэта кандытарская глазура. Замест дарагога какава-масла выкарыстоўваюцца: заменнік какава-масла, маргарын або раслінны алей з даданнем какава-парашка, эмульгатара лецыціну. Лецыцін у натуральным выглядзе ёсць у малацэ, яйках, ікры i адносiцца да карысных фасфаліпідаў.

У якасці напаўняльнікаў часта выкарыстоўваецца ягадны джэм, паста «Вараная згушчонка», у склад якіх могуць уваходзіць стабілізатары: мадыфікаваныя крахмалы (не блытайце з генна-мадыфікаванымі прадуктамі), агар, рэгулятары кіслотнасці: лімонная кіслата, двукіслы натрый. Усе гэтыя харчовыя дадаткі дазволены ў харчаванні, аднак не выключаюцца алергічныя рэакцыі пры іх выкарыстанні.

Звяртайце ўвагу на тэрміны прыдатнасці і ўмовы захоўвання. Аптымальны час захоўвання 15 сутак пры тэмпературы +2 ...+ 6°С. Больш працяглыя тэрміны пры гэтай жа тэмпературы кажуць пра выкарыстанне кансервантаў. Для замарожаных сыркоў тэрміны захоўвання і тэмпературны рэжым захоўвання значна адрозніваюцца. Так, пры тэмпературы -18°С яны могуць захоўвацца да 180 дзён незалежна ад наяўнасці кансервантаў.

Выбіраем глазураваны сырок. Інструкцыя

Крок 1. Прачытайце ўважліва назву!

«Глазураваны тварожны сырок» альбо «сырок глазураваны»?

Калі ў назве прапушчана слова «тварожны» – уважліва прачытайце этыкетку, высокая верагоднасць, што ў складзе ёсць раслінныя тлушчы.

Крок 2. Ацаніце склад прадукту!

У складзе на першым месцы павінен стаяць тварог, а не тварожны прадукт. Аддавайце перавагу глазураваным тварожным сыркам з натуральнымі напаўняльнікамі, такім як какава, разынкі, чарнасліў або курага.

Чым менш у складзе смакаводарных і іншых штучных дадаткаў, тым больш карысці ў гэтым прадукце.

Крок 3. Знайдзіце харчовую каштоўнасць прадукту!

Звярніце ўвагу не толькі на ўтрыманне тлушчу, але і іншых нутрыентаў (цукру і бялку). Нізкае ўтрыманне тлушчу не азначае нізкае ўтрыманне калорый!

Крок 4. Знайдзіце інфармацыю пра тэрмін прыдатнасці!

Вытворца абавязаны паказаць дату вырабу, тэрміны і ўмовы захоўвання сырка на этыкетцы. Выбірайце тварожныя сыркі з кароткімі тэрмінамі прыдатнасці (≤ 15 сутак).

Хатняя лабараторыя

Крок 1. Адкрыйце ўпакоўку!

Упакоўка не павінна мець пашкоджанняў, а глазура сырка – прыліпаць да ўпаковачных матэрыялаў.

Крок 2. Ацаніце знешні выгляд і форму сырка!

Форма сырка можа быць рознай: цыліндрычнай, авальнай, прамавугольнай. Структура не павінна быць парушаная. У правільнага сырка паверхня раўнамерна пакрыта глазурай. У аснове можа прасвечваць тварожная маса.

Форма дэфармаваная, а глазура месцамі адпала? Гэта магло адбыцца пры парушэнні ўмоў захоўвання і неналежным абыходжанні з прадуктам падчас гандлю.

Крок 3. Ацаніце колер сырка!

Колер можа быць белым ці з крэмавым адценнем. Калі ў склад уваходзяць смакаводарныя напаўняльнікі, то колер будзе абумоўлены колерам кампанента. Афарбоўка сырка павінна раўнамерна размяркоўвацца па ўсёй масе.

Шаг 4. Оцените вкус!

Ён павінен быць характэрным для кісламалочных прадуктаў ці з прысмакам унесеных напаўняльнікаў, а кансістэнцыя – мяккай, без выяўленых камячкоў.

Усё адпавядае? Віншуем, вы купілі якасны прадукт!

79 0 55

Старшы выкладчык кафедры гігіены і медыцынскай экалогіі Беларускай медыцынскай акадэміі паслядыпломнай адукацыі.

Каб перайсці да абмеркавання, выканайце уваход або зарэгіструйцеся

Наверх