20 Снежня
20.12.2019

Мышкі любяць сыр! Пачастуем шэрых?! :)

logo
Думкі ўслых
133 0 30
Памер шрыфта:
  • A
  • A
  • A

Хаця надвор’е і не дае нам сёлета шанцу настроіцца на падрыхтоўку да навагодніх святаў, затое каляндар безапеляцыйна нагадвае, колькі дзён у нас засталося. Але, як звычайна, усе намеры зрабіць тое, тое і яшчэ тое зараней пераважна намерамі і застаюцца…

Год Мышкі. Паспець усё зрабіць.

А так хочацца ўсё паспець і проста хаця б крыху адпачыць. Ды дзе там… Заканчэнне года. І ўсё ж калі-нікалі вока выхапіць штосьці ў сеціве, перадасць мозгу… І вось ужо круціцца ў галаве якая-небудзь думка, настойліва распіхваючы астатнія.

Вы прыдумалі ўжо, якімі адмысловымі стравамі ўпрыгожыце навагодні стол? Альбо ў ноч на 31-га снежня, альбо ўдзень 1-га?! Ці такім нават не замарочваецеся? Наступны год па ўсходнім календары – Пацука… Але мне даспадобы, вядома ж, больш мяккія прадстаўнікі гэтага сямейства. Таму ў мяне будзе год Мышкі!

Год Мышкі.

«Што за дзіцячы сад?!» – абурана ўсклікне хтосьці. Ну, а чаму б і не?! Я так часта ўзгадваю пра тое, што ў душы большасць з нас усё роўна застаецца дзецьмі. Дык чаму б і не пагуляцца?! Нікому ж ад гэтага не блага. Мы ў сваёй сям’і – гуляемся! 🙂

Амаль год таму я пісала ўжо тут, як штосьці з усходніх традыцый перайначыла пад сябе. І што сабрала калекцыю з 12-ці невялікіх мяккіх цацак, якія па чарзе з’яўляюцца «гаспадарамі года» і сустракаюць свой прыход… за пачастункам.

Так, Малпу мы «частавалі» бананамі, Пеўня – зернем. А Мышку збіраемся частаваць, вядома ж, сырам! Тым больш, што якраз ідэю адной «стравы» падгледзела ўжо ў сеціве! Толькі задумалася. Вушкі ў мышак – з радыскі. Не думаю, што ўзімку ў нашым невялікім гарадку яе набуду без праблем.

А зараз задала тых мышак у пошуку… Ого! Яшчэ лягчэй! Вушкі з морквы, з кансерваванага агурка, з таго ж самага сыру, з каўбасы… Во, гартайце слайдэр!

А ўвогуле, у нашай сям’і адна з любімых страў на любым святочным стале, не толькі на навагоднім, – сыр з часнаком і маянэзам! Так, шкодна… Але ж ніхто яго не есць лыжкамі штодня. А хто любіць вастрыню і можа спажываць без шкоды для страўніка… Смаката!

І вось як толькі гэтая ідэя (сыру на стале) пасялілася ў галаве, я адразу пачала шукаць інфармацыю пра карысць і шкоду прадукта. Маю на ўвазе звычайны, тыпу «Расійскага». Розныя экзатычныя там, вострыя, з плесняю… Не, гэта для мяне, гэта – міма. 🙂

Дык што ж карыснага ў сыры? Дзякуючы ўтрыманню кальцыю, ён незаменны для зубоў. І нават пры пераломах касцей раяць есці пабольш сыру! Паляпшае дзейнасць нервовай сістэмы (!!!). Во! Якраз тое, што трэба падчас шалёнай беганіны ў апошнія дні года старога.

Год Мышкі. Сыр.

Яшчэ – стымулюе выпрацоўку калагену. Ну здорава! Яго «любяць» шчытападобная залоза, пазногці, валасы і «баіцца» астэапароз. Сыр рэгулюе абмен рэчываў, добра ўплывае на зрок… Карацей, во колькі ўсяго станоўчага! І сапраўдная «бомба» (пры ўмове, што гэта праўда) – сыр засвойваецца арганізмам на 99%.

Але, на жаль, есці можна не ўсім. Альбо спажываць толькі па мале-е-е-енечкаму кавалачку. Калі ў вас – атэрасклероз, павышаны халестэрын, язва страўніка, гастрыт, павышаны артэрыяльны ціск альбо сардэчныя захворванні. І штосьці мне падказвае, што гэты спіс далёка не поўны… Плюс многае залежыць і ад віду сыру.

Год Мышкі. Адмова ад сыру.

І – спажываць па адчуваннях, вядома. Прыслухоўвацца да свайго арганізма – гэтая ўніверсальная парада сапраўды заслугоўвае ўвагі. І рэальна працуе.

А вы будзеце частаваць Мышку сырам?! 🙂

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

133 0 30

Рэдактар беларускай версіі сайта, журналіст, блогер
Наверх