30 Снежня
30.12.2019

Піратэхнічнае шоу і «Калядны кірмаш». Дзе і як адсвяткаваць Новы год

logo
Навiны
124 0 14
Памер шрыфта:
  • A
  • A
  • A

Засталося зусім няшмат пачакаць – і да нас завітае Новы год! Урачыстасць, калі вакол пануе асаблівая чароўная атмасфера. Вітрыны крамаў ужо даўно ўпрыгожаныя навагоднімі дэкарацыямі, а гарадскія вуліцы цешаць мінчан і гасцей сталіцы арыгінальнымі ёлкамі і святочнай ілюмінацыяй.

Новы год-2019. Мінск.

У навагоднюю ноч маштабнае свята разгорнецца на Кастрычніцкай плошчы Мінска. Канцэрт «Чароўная зорная ноч» пачнецца 31 снежня ў 23.30 і завершыцца 1 студзеня ў 04.00. У праграме святочнага шоу – выступленне папулярных беларускіх артыстаў. Пра гэта распавёў журналістам у Нацыянальным прэс-цэнтры намеснік начальніка ўпраўлення культуры Мінгарвыканкама Аляксандр Шастакоў.

Масавыя гулянні зладзяць таксама ва ўсіх раёнах горада. Усяго арганізавана больш за 20 пляцовак. Плануецца, што гулянні завершацца ў 3-4 гадзіны раніцы.

На пляцоўцы каля Палаца спорту 1 студзеня ў 1.30 стартуе лазерна-піратэхнічнае феерверк-шоу. Як абяцаюць арганізатары, гледачоў чакаюць незабыўныя спецэфекты і музычнае суправаджэнне.

Новы год-2020. Салют. Мінск.

Паспець да Новага года

У тыя два дні, што засталіся да Новага года, яшчэ ёсць час наведаць кірмашы і святочныя прадстаўленні. Некаторыя з іх будуць працягваць сваю працу і пасля свята. Так, па 5 студзеня ўключна на тэрыторыі Верхняга горада па вечарах будзе праходзіць прадстаўленне «Чароўная шкатулка Дзеда Мароза».

У гістарычным цэнтры горада нечакана з'явіўся цудоўны куфэрак. Хтосьці падумае, што гэта чарговы навагодні жарт, але на гэты раз усё сур'ёзна. Ён адчыняецца двойчы ў дзень (у 17.00 і ў 20.00), але толькі для тых, хто верыць у цуды і па-сапраўднаму чакае Новага года, папярэдзіў Аляксандр Шастакоў.

Да 5 студзеня можна атрымаць асалоду ад музычнай казкі «Навагодні зарапад». Прадстаўленне праходзіць два разы на дзень у 19.00 і ў 21.00 на Кастрычніцкай плошчы.

Традыцыйны «Калядны кірмаш» разгарнуўся каля Палаца спорту і на Кастрычніцкай плошчы. Ён будзе працаваць да 15 студзеня. Напрыклад, на Кастрычніцкай плошчы можна пакаштаваць дранікі і блінцы з рознымі начынкамі, перакусіць бургерам ці хот-догам, паесці венскіх калачоў, шашлыкоў або пакаштаваць іншыя стравы, прычым не толькі беларускай кухні.

Каля Палаца спорту арганізаванае катанне на сабачых запрэжках і поні, праходзіць шоу самавараў, працуе фотазона. Самыя маленькія госці могуць адаслаць ліст Дзеду Марозу праз імправізаваную навагоднюю пошту.

Акрамя гэтага, у кожным раёне Мінска праходзяць розныя калядныя і навагоднія прадстаўленні, канцэртныя праграмы, творчыя праекты, фізкультурна-спартыўныя святы, спектаклі. Святочныя мерапрыемствы будуць радаваць жыхароў горада да Калядаў. Кожны зможа знайсці для сябе забаву.

Напрыклад, у Фрунзенскім раёне горада ў навагоднюю ноч запланаваныя адразу два феерверкі. Ля Мінскага лядовага палаца ён расквеціць неба ў гадзіну ночы, а ў парку Уга Чавеса – на паўгадзіны пазней. У парку 60-годдзя Кастрычніка 4 студзеня пройдзе фестываль снежных скульптур.

У Заводскім раёне на тэрыторыі заапарка да 31 снежня будзе працаваць казачны домік Дзеда Мароза. Масавыя гулянні «Няхай новы год будзе шчаслівым» пройдуць на пляцоўках каля «Мінск-арэны» і ўніверсама «Беларусь».

У Маскоўскім раёне святочнае гулянне «Прывітанне, Новы год!» запланаванае ў парку імя Паўлава. Тут жа мінчан чакаюць на святочную праграму «Светлае свята Ражства» 7 студзеня.

Падрабязна даведацца пра ўсе гарадскія святочныя мерапрыемствы і ўдакладніць іх дату і час можна тут.

Для тых, хто не паспеў набыць пушыстую прыгажуню, яшчэ ёсць такая магчымасць. Ёлачныя базары, для якіх было арганізавана 80 пляцовак, будуць працаваць да 31 снежня ўключна.

Дарэчы, сёлета для ўпрыгожвання горада, адзначыў галоўны інжынер «Мінгарсвятла» Аляксандр Варабцоў, было выкарыстана 107 км ілюмінацыі, 4 тысячы 685 штук гірляндаў, якія складаюцца з 117 тысяч 765 штук лямпачак.

Працаваць святочная ілюмінацыя будзе ў вячэрні час да Старога Новага года (13 студзеня). Прычым у Новы год, Каляды і на Стары Новы год яна будзе радаваць мінчан да самай раніцы.

Шчаслівага Новага года!

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

124 0 14

Наверх