1 Мая
01.05.2020

Прыбіранне, якое змяняе жыццё. Як чыстая прастора дапамагае нам прыйсці да шчасця

logo
Знайдзі сябе
168 0 37
Памер шрыфта:
  • A
  • A
  • A

Не можаце знайсці сілы для новага праекта? Складана развітацца з мінулым, што траўмуе? Не разумееце, у чым вашае прызванне і чаго хочаце ад жыцця? Адчуваеце пастаянны заняпад сіл і роспач? Магчыма, вам дапаможа... прыбіранне. Чысцячы свой дом ад залішняй захламленасці, мы атрымліваем яшчэ адзін бонус: перабудову ладу мыслення і дадатковую ўпэўненасць у сабе.

Мары Конда. Прыбіранне.

Насамрэч для шчасця нам трэба не так шмат рэчаў. Галоўнае, каб усе прадметы, якія навокал нас, былі любімымі. Па назіраннях вядомага ва ўсім свеце кансультанта па навядзенні парадку ў доме – японкі Мары Конда, сярэдняя колькасць рэчаў, выкінутая пасля працы з ёй адным-адзіным чалавекам з невялікага жылля, вагаецца ад дваццаці да трыццаці 45-літровых смеццевых мяшкоў, а ў сямейства з трох чалавек  набліжаецца да 70 мяшкоў.

Нашаму чалавеку, які звыкла захоўвае ўсё «на ўсялякі выпадак» і «раптам спатрэбіцца», паверыць у неабходнасць такіх радыкальных мераў складана. Аднак доказам іх эфектыўнасці стала папулярнасць Мары. У 2015 годзе яна ўвайшла ў сотню самых уплывовых людзей у свеце па версіі часопіса Times.

Зараз, калі мы ўсе праводзім дома шмат часу, у нас ёсць унікальная магчымасць выпрабаваць на сабе «магію» прыбірання. Упэўнена: штосьці карыснае з гэтай японскай філасофіі зможа знайсці для сябе кожны.

Прызванне – прыбіранне! Чаму б і так

Сама Мары Конда – яркі прыклад таго, як важна слухаць уласнае сэрца. Цяжка ўявіць, што любоў да прыбірання можа прывесці кагосьці да паспяховага жыцця. Аднак для Мары, якая пачала зачытвацца часопісамі пра навядзенне парадку дома і арганізацыі прасторы з 5 гадоў, гэта зрабілася паспяховай і прыбытковай справай жыцця. Сёння яна папулярная не толькі ў Японіі, але і ЗША, Вялікабрытаніі. У 2019 годзе Netflix выпусціў серыял «Прыбіранне з Мары Конда», за ўклад у які КонМары была намінаваная на прэмію «Эмі».

Мары Конда. Прыбіранне.

Што ж так закранула людзей у падыходзе Мары? Бо спосабаў прыбірання існуе мноства. Думаецца, сакрэт у адмысловым спалучэнні парадаў па навядзенні парадку і філасофскага падыходу, калі праз стаўленне да рэчаў мы вучымся лепей разумець сваё жыццё. Дзякуючы парадам Мары, мы не проста прыбіраем сваё жыллё, але і напаўняем яго сваёй энергіяй, любоўю. А ідэя пра чыстую прастору, у якой і дыхаецца лягчэй, вельмі дарэчы ў невялікіх кватэрах. Мары пераконвае, што нават самы закаранелы гультай і неахайны чалавек не зможа жыць у вэрхале пасля таго, як адчуе, што такое сапраўдны парадак.

Што такое прыбіранне па Мары Конда?

  • Асаблівая падзея.

Прыбіранне часта асацыюецца з руцінай і абавязковай павіннасцю. Але штодзённасць – велізарны кавалак нашага жыцця. Замест таго, каб наракаць на неабходнасць прыбірацца, можна ўявіць гэты момант як асаблівую падзею, вызваленне свайго жылля ад смецця і бруду. Менавіта таму падчас рытуалу прыбірання Мары лічыць за лепшае надзяваць не расцягнутыя трэнікі, а прыгожую вопратку. Для таго, каб адчуць эфект палягчэння і абнаўлення, трэба выканаць прыбіранне хутка, на адным дыханні, лепей пачаць раніцай. У гэтым крыецца асноўны сакрэт. Аднойчы адчуўшы момант катарсісу ад ператварэння свайго жылля, чалавек ужо не хоча вяртацца да захламленасці. Для яго гэта робіцца непрымальным і некамфортным.

Мары Конда. Прыбіранне.

  • Медытатыўны працэс.

Аднойчы мудрая жанчына запрасіла Мары на медытацыю пад вадаспадам. Адчуваючы прахалоду і тоўшчу вады, якая абвальвалася на яе цела, дзяўчына адчула дзівоснае супакаенне і яснасць розуму. Гэтае ж пачуццё, прызнаецца Мары, узнікае ў чалавека падчас прыбірання свайго дома. Не спяшаючыся, уважліва перабіраючы рэчы ў цішыні, можна адчуць тое самае супакаенне, і для гэтага не абавязкова ехаць у далёкія спецыяльныя месцы. Дарэчы, менавіта для апускання ў медытатыўны стан Мары не рэкамендуе займацца прыбіраннем пад энергічную музыку. Лепей ажыццяўляць гэтую асаблівую працэдуру ў цішыні альбо пры лёгкай мелодыі без слоў.

  • Размова з сабой.

Мары прапануе не проста пазбаўляцца ад непатрэбных рэчаў. Кожная рэч, якую вы бераце ў рукі, выклікае водгук ці эмоцыі. Пакінуць трэба толькі тыя, якія прыносяць сапраўдную радасць. Не проста «няхай будзе, можа спатрэбіцца», але адчуванне «біцця сэрца» штораз, калі вы пазіраеце на яе. У ідэале ўвесь дом паступова зробіцца месцам, дзе сканцэнтраваныя толькі самыя любімыя рэчы. Гэтая гутарка з сабой вельмі псіхатэрапеўтычная, бо для таго, каб адсартаваць прадметы на выкід і для захоўвання, трэба навучыцца па-сапраўднаму прыслухоўвацца да сябе. Дарэчы, адна з важных рэкамендацый Мары: не праводзіць прыбіранне пры іншых членах сям'і, асабліва бацьках. Відовішча таго, як вы выкідваеце велізарную колькасць рэчаў, для іх можа быць невыносным. «А вось гэтую кофтачку можна яшчэ насіць, і гэты кілімок мне таксама яшчэ спатрэбіцца», – тыповыя словы мамы, якая заспявае сваю дачку за навядзеннем парадку. У такіх выпадках вы не пазбаўляецеся ад непатрэбных рэчаў, а проста дазваляеце захламленасці перавандраваць у іншае месца.

Мары Конда. Прыбіранне. На адзіноце.

  • Падрыхтоўка да зменаў у жыцці.

Прыбіранне «перазагружае» вашае жыццё. «Візуальны беспарадак адцягвае нас ад сапраўднай крыніцы беспарадку ў нашым жыцці. Сам акт захламлення насамрэч ёсць інстынктыўны рэфлекс, які адцягвае нашу ўвагу ад кораня праблемы. Калі ваш пакой чысты і не захламлены, у вас не застаецца іншага выбару, акрамя як вывучыць свой унутраны стан. Вы набываеце здольнасць убачыць праблемы, якіх пазбягалі, і вымушаныя разбірацца з імі», – перакананая Мары. Толькі пазбавіўшыся ад грузу мінулага, можна перайсці да пабудовы чагосьці новага. Многія рэчы ў рэчаіснасці ўжо даўно выканалі сваю функцыю і маюць патрэбу ў тым, каб вы іх «адпусцілі».

  • Рытуал на ўдачу

Не сам акт прыбірання, але парадак, які з'явіўся пасля яго, прыводзіць да таго, што ў чыстай і напоўненай любімымі прадметамі прасторы пачынае цыркуляваць іншая энергія. Ведаючы гісторыю самай Мары, паверыць у гэта даволі проста.

Мары Конда. Прыбіранне. Цыркуляцыя новай энергіі.

  • Памочнік у пошуку прызвання.

«Лепшы спосаб высветліць, што нам насамрэч трэба, – пазбавіцца ад таго, што нам не трэба. Для гэтага больш не патрабуюцца паездкі ў далёкія краіны або нястрымны шопінг. Усё, што неабходна зрабіць, – выключыць тое, у чым няма неабходнасці, належным чынам падышоўшы да кожнага прадмета, які вам належыць», – піша Мары. Многія яе кліенты пасля дбайнага прыбірання дома змаглі знайсці сябе. Як? Паколькі ў доме засталіся толькі тыя рэчы, якія яны сапраўды любяць, людзі пачынаюць бачыць свае сапраўдныя прыхільнасці. Напрыклад, дзяўчына, якая працавала ў IT-кампаніі, выявіла, што з кніг у яе доме засталіся толькі тыя, дзе распавядаецца пра мамаў з дзецьмі. І ніводнай пра камп'ютары... Ашаломленая гэтым адкрыццём, дзяўчына вырашылася змяніць сваё жыццё: сышла з працы і адкрыла агенцтва па падборы няняў. Гэтая праца па-сапраўднаму натхніла яе!

  • Трэніроўка выбіральнасці.

«Кожны прадмет павінен адыгрываць пэўную ролю. Не ўся вопратка прыходзіць да вас для таго, каб быць абношанай да дзірак. Тое ж самае і з людзьмі. Не кожны чалавек, якога вы сустракаеце ў сваім жыцці, зробіцца для вас лепшым сябрам або закаханым. З аднымі вы так і не зможаце зладзіць, а іншых не зможаце палюбіць, але і гэтыя людзі даюць вам каштоўныя ўрокі: дзякуючы ім вы разумееце, хто вам падабаецца, каго вы любіце, каб шанаваць гэтых асаблівых людзей у сваім жыцці яшчэ больш», – апісвае працэс выбару Мары Конда. Паколькі для таго, каб ачысціць свой дом, вам трэба пастаянна задаваць сабе пытанні пра свае пачуцці і жаданні, праз пэўны час вы пачынаеце адзначаць, што рашэнні і ва ўсіх іншых сферах цяпер даюцца вам лягчэй. А пакінуць у сваім жыцці хочацца толькі самае лепшае. І гэта не толькі пра жыллё.

Маыр Конда. Прыбіранне. Лёгкасць рашэнняў.

  • Паляпшэнне самаадчування.

Дэтаксікацыя дома часта запускае падобны эфект і ў арганізме чалавека. Паветра ў памяшканні робіцца больш чыстым, паляпшаецца сон, зніжаецца ўзровень стрэсу. Мары адзначае, што часта заўважала ў сваіх кліентаў цікавы эфект: разам з лішнімі рэчамі «сыходзяць» і лішнія кілаграмы, жывот робіцца больш плоскім. Парадак у кнігах дапамагае ачысціць розум. А чыстая ракавіна і паменшаная колькасць касметыкі пазітыўна ўплываюць на скуру. Можна лічыць гэта смешным, але ж камусьці захочацца праверыць.

Прыбіранне – не цяжкая павіннасць, а асаблівая падзея, якая можа ачысціць ад хламу не толькі ваш дом, але і жыццё. Адметная японская філасофія вучыць пакідаць у сваім жыллі толькі тыя рэчы, якія напаўняюць сэрца любоўю. Пра тое, як правільна гэта рабіць і з чаго пачаць, распавядзём у наступным матэрыяле.

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

168 0 37

Журналіст. Член Беларускага саюза журналістаў. Лаўрэат прэміі Беларускага саюза журналістаў.
Наверх